អង់គ្លេស៖ អ្នកចាត់ការ Pep Guardiola បាននិយាយនៅមុនការប្រកួតជើងទី១ វគ្គ៨ក្រុមចុងក្រោយទល់នឹង Bayern Munich នៅថ្ងៃអង្គារនេះថា Manchester City ហាក់អស់សង្ឃឹមក្នុងក្ដីស្រមៃនៃការឈ្នះពាន Champions League ហើយថាការប៉ុនប៉ងតែម្យ៉ាងមិនគ្រប់គ្រាន់ក្នុងការគ្រងជើងឯកនោះឡើយ។

គួរបញ្ជាក់ថា លោក Pep Guardiola ត្រូវបានគេចាត់ទុកថាលោកគឺជាអ្នកចាត់ការដ៏ជោគជ័យមួយរូបនៅ Manchester City បន្ទាប់ពីលោកបានដឹកនាំក្លិបឈ្នះជើងឯកលីគកំពូល ៤ដង , FA Cup ម្តង និង League Cup ៤ដង ប៉ុន្តែនៅតែមិនទាន់អាចដឹកនាំក្លិបឈ្នះពានអឺរ៉ុបនៅឡើយ ខណៈលោកធ្លាប់ដឹកនាំ FC Barcelona និង Bayern Munich ឱ្យគ្រងជើងឯករួចទៅហើយ។ 

ក្រោមការដឹកនាំរបស់អ្នកចាត់ការសញ្ជាតិអេស្ប៉ាញរូបនេះ Manchester City បានឡើងដល់វគ្គ ៨ក្រុមចុងក្រោយ ៦រដូវកាលជាប់ៗគ្នា និងធ្វើបានល្អបំផុតត្រឹមចំណាត់ថ្នាក់ជើងឯករងកាលពីឆ្នាំ២០២១។ លោក Pep Guardiola បានឆ្លើយប្រាប់អ្នកសារព័ត៌មានថា លោកពិតជាចង់ឈ្នះពាន Champions League ជាមួយ Manchester City "ខ្លាំងណាស់"។ 

លោកបាននិយាយប្រាប់ទៅកាន់ក្រុមអ្នកសារព័ត៌មានថា៖ "យើងចង់សាកល្បង។ ពិតជាកិត្តិយសណាស់ដែលបានលេងទល់នឹងក្រុមកំពូលៗដូចជា Bayern Munich ជាដើម។ យើងមិនហ៊ានធានាទេ ដោយយើងត្រូវលេងការប្រកួតទល់នឹង Bayern Munich ពីរជើងដែលនឹងចាប់ផ្តើមពីថ្ងៃស្អែកនេះ។ យើងបានព្យាយាមជារៀងរាល់រដូវកាល ហើយក្រុមដែលយើងអាចជួបសុទ្ធតែជាក្រុមដែលល្អដូចគ្នា ហើយពួកគេក៏ចង់ឈ្នះការប្រកួតដែរ។ ក្តីស្រមៃរបស់ខ្ញុំគឺចង់ឈ្នះពាននេះម្តងទៀត ហើយយើងនឹងព្យាយាមប៉ុន្តែមិនប្រាកដថាយើងនឹងឈ្នះនោះទេ"។

ក្រុមរបស់លោក Pep Guardiola នឹងត្រូវជួបជាមួយ Bayern Munich ដែលបច្ចុប្បន្នស្ថិតក្រោមការដឹកនាំរបស់លោក Thomas Tuchel នាការប្រកួត UEFA Champions League ជើងទី១ នាថ្ងៃទី១២ ខែមេសាស្អែកនេះនៅទឹកដីអង់គ្លេស មុនពេលដែលជួបគ្នាជើងទី២ នាថ្ងៃទី២០ ខែមេសានៅទឹកដីអាល្លឺម៉ង់វិញ។ គួរបញ្ជាក់ថា ការជួបគ្នាលើកចុងក្រោយបង្អស់របស់អ្នកចាត់ការទាំងពីរនៅក្នុងក្របខណ្ឌ Champions League គឺតាំងពីឆ្នាំ២០២១ ដែលកាលណោះ លោក Thomas Tuchel ដឹកនាំ Chelsea ឈ្នះ Manchester City នៅវគ្គផ្តាច់ព្រ័ត្រ៕